Kindergarten

sa TDSB

Madalas na mga Tinatanong

1. Sino ang maaaring pumasok sa kindergarten?

Bawat batang nakatira sa Toronto ay maaaring pumasok sa isang paaralan ng TDSB. Para makapasok sa Junior Kindergarten sa Setyembre, ang mga bata ay dapat na maging apat na taon sa Ika-31 ng Disyembre ng taong iyon. Para makapasok sa Senior Kindergarten sa Setyembre, ang mga bata ay dapat na maging limang taon sa ika-31 ng Disyembre ng taong iyon.

2. Sino ang maaaring magparehistro sa isang bata para sa kindergarten?

Tanging ang isang magulang o legal na tagapag-alaga ang maaaring magparehistro sa isang bata para sa kindergarten.

3. Kailan ko ipaparehistro ang aking anak para sa kindergarten?

Ang pagpaparehistro para sa kindergarten ay nagsisimula sa Pebrero at nagpapatuloy sa buong taon ng pasukan. Bawat paaralan ay nagtatalaga ng partikular na mga araw ng pagpaparehistro; mangyaring makipag-ugnayan sa inyong lokal na paaralan para sa mga ispesipikong petsa at mga panahon. Pakitandaan: ang proseso ng aplikasyon para sa French Immersion ay nagaganap sa Enero ng taon kung kalian ang inyong anak ay nasa Junior Kindergarten.

4. Aling paaralan ang dapat na pasukan ng aking anak?

Upang malaman kung aling paaralan ang dapat na pasukan ng inyong anak, pakitawagan ang 416.394.7526 o bisitahin ang tdsb.on.ca at i-click ang Hanapin ang Iyong Paaralan (Find Your School) sa itaas ng pahina.

5. Paano kung nais kong papasukin ang aking anak sa isang paaralan na iba kaysa sa itinakda ng aking home school batay sa address?

Maaari kang mag-apply sa isang labas-sa-lugar na mga paaralan sa pamamagitan ng Patakaran sa Opsyonal na Pagdalo (Optional Attendance Policy) sa tdsb.on.ca. Pakitandaan na maramingpaaralan ang sarado sa opsyonal na pagdalo dahil sa limitasyon ng espasyo. Maaaring naisin ninyo munang makipag-ugnayan sa inyong piniling paaralan upang makita kung sila ay bukas sa mga aplikasyon para sa opsyonal na pagdalo.

6. Kailan ko maaaring iparehistro ang aking anak sa French Immersion?

Ang Programang Early French Immersion ay nagsisimula sa Senior Kindergarten. Ang mga oportunidad para sa French Immersion ay makukuha rin sa Programang Middle Immersion, na nagsisimula sa ika-4 na Baiting. Para sa karagdagang impormasyon, pakibisita ang tdsb.on.ca > Elementary School > School Choices > French Programs.

7. Anong impormasyon ang dapat kong dalhin upang iparehistro ang aking anak para sa kindergarten?

Para iparehistro ang inyong anak para sa kindergarten, mangyaring magdala ng katibayan ng:

• edad (isang sertipiko ng kapanganakan o rekord ng binyag o pasaporte)
• tirahan (dalawang piraso ng pagkakakilanlan na nagpapakita ng inyong tirahan, kagaya ng bill ng inyong telepono, mga lisensya ng pagmamaneho, atbp.)
• pagpapabakuna (ang kard na nagpapakita ng isang listahan ng mga bakuna na natanggap ng inyong anak)

8. Paano kung ipinanganak ang aking anak sa labas ng Canada?

Kung ipinanganak sa labas ng Canada ang inyong anak, ang pagpapatotoo ng petsa ng pagdating ay kinakailangan. Ang mga pamilya na permanenteng residente at mga refugee claimant ay maaaring magparehistro nang diretso sa paaralan. Ang lahat ng ibang mga pamilya ay nararapat na magpunta sa International Program at Admissions Office, 5050 Yonge Street, para sa isang Liham ng Pagtanggap ng Paaralan. Ang mga batang walang estado ng imigrasyon ay malugod na tinatanggap sa aming mga paaralan at ang impormasyon ay hindi ipamamahagi sa mga awtoridad ng imigrasyon, alinsunod sa Patakaran ng TDSB P.061 SCH.

9. Paano kung wala ako ng lahat ng mga dokumentong nasa itaas?

Mangyaring personal na makipag-ugnayan sa International Programs and Admissions Office, o sa pamamagitan ng telepono/email — 5050 Yonge Street (unang palapag), Tel: 416.395.8120, Email: admissions@tdsb.on.ca.

10. Paano kung may mga espesyal na pangangailangan sa pag-aaral ang aking anak?

Kung ang inyong anak ay may mga espesyal na pangangailangan sa pag-aaral at papasok sa paaralan sa unang pagkakataon, pakitawagan ang inyong lokal na paaralan upang magtakda ng isang appointment sa punong-guro at sa isang kinatawan mula sa Departamento ng Espesyal na Edukasyon ng TDSB. Sa pagpupulong na ito, maaari ninyong ibahagi ang anumang pangangailangan, nauugnay na dokumentasyon, at talakayin ang mga suportang makukuha ng inyong anak mula sa paaralan. Sa ating pagtutulungan, maaari nating malaman ang mga suporta at mga mapagkukunan para sa kakailanganin ng inyong anak para sa isang matagumpay na transisyon sa paaralan.

11. Ano pang ibang impormasyon ang kakailanganin ng paaralan ng aking anak?

Upang matulungan gawing isang ligtas at masaya ang kapaligiran para sa inyong anak, kailangan malaman ng inyong paaralan ang:

• tawag na pangalan sa inyong anak, kung ito ay naiiba sa opisyal na dokumentasyon
• anumang mga allergy at/o iba pang mga medikal na alalahanin
• mga kasalukuyang numero ng telepono (tahanan, trabaho, cell) para sa (mga) magulang/(mga) tagapag-alaga kung saan nakatira ang bata at ng taong sumusundo sa bata mula sa paaralan
• pangalan at numero ng telepono ng tagapagbigay ng pangangalaga ng bata
• pangalan ng kontak na pang-emergency at numero ng telepono
• mga pangalan ng mga kapatid na lalaki at/o mga kapatid na babae na dumadalo sa paaralan
• (mga) wikang sinasalita sa tahanan
• anumang legal o personal na mga sirkumstansiya na maaaring makaapekto sa inyong anak

Mahalagang panatilihing pangkasalukuyan ang inyong impormasyon. Mangyaring ipaalam sa paaralan ang anumang mga pagbabago sa impormasyon sa itaas sa loob ng taon ng paaralan.

Bilang bahagi ng pagrerehistro para sa paaralan, kayo ay hihingiang magkumpleto ng isang Developmental History Form. Ang form na ito ay ginagamit upang kolektahin ang impormasyon tungkol sa mga interes at pag-unlad ng inyong anak. Makakatulong ito sa guro sa pagpaplano ng isang programa upang matugunan ang mga pangangailangan ng inyong anak.

12. Ano ang natututunan ng mga bata sa kindergarten?

Sa kindergarten, natututo ang bata sa isang kapaligiran ng pag-aaral na batay sa paglalaro na may isang pangkat ng mga tumutugon na tagapagturo na nagpaplano ng mga karanasan ng pag-aaral na nagtataguyod ng pagtatanong at mas mataas na antas ng pag-iisip sa anim na bahagi ng pag-aaral: wika, matematika, agham at teknolohiya, personal at sosyal na pag-unlad, kalusugan at pisikal na aktibidad, at sining.

Sa kahabaan ng dalawang-taong programa, ang mga bata ay matututo ng pamamalakad ng sarili, at magkakaroon ng kakayahang bumasa at sumulat habang pinapaunlad ang mga positibong pag-uugali tungo sa pag-aaral at paaralan. Naroroon ang mga oportunidad sa buong araw ng kindergarten para sa mga bata upang magalugad ang mga sentro ng pag-aaral na kabilang ang drama, pagsusulat, matematika, sulok para sa aklat, pagpipinta at nakikitang mga sining, at paggawa na gumagamit ng mga materyales tulad ng buhangin, tubig, at mga bloke ng konstruksyon.

Simula sa Setyembre 2014, ang kindergarten na programa ay ibabatay sa Programang Buong-Araw na Maagang Pag-aaral na Kindergarten (Full-Day Early Learning Kindergarten Program, Draft Version 2010-2011 (edu.gov.on.ca).

13. Paano ako makakasangkot sa edukasyon ng aking anak?

Maraming mga paraan para maging aktibo kayong makalahok sa edukasyon ng inyong anak at matulungan ang inyong anak na magtagumpay sa paaralan.

• Kausapin ang inyong anak tungkol sa paaralan araw-araw.
• Basahan ang inyong anak.
• Purihin ang trabaho ng inyong anak upang matulungan na magkaroon ng lakas ng loob.
• Pansinin ang mga lakas ng inyong anak at ang mga aspeto na kailangan nilang pagbutihin. Ibahagi ang impormasyong ito sa guro.
• Dumalo ng mga komperensya ng magulang-guro.
• Makisali sa mga aktibidad ng paaralan at sa konseho ng paaralan.
• Suportahan ang programa ng silid-aralan sa pamamagitan ng pagboboluntaryo.

14. Paano ko malalaman ang sitwasyon ng aking anak sa paaralan?

Makikipag-usap sa inyo ang inyong guro sa maraming mga paraan sa buong taon, nang kapwa pormal at hindi. Sa mga panayam ng magulang-guro at sa mga report kard, ibabahagi sa inyo ng guro ang impormasyon tungkol sa progreso at natatamo ng inyong anak. Dahil kayo ang totoong nakakakilala sa inyong anak, kayo ay hinihimok na magbahagi ng mga update at makipag-ugnayan sa inyong guro sa buong taon ng paaralan.

15. Anong mga programa bago at pagkatapos ng pagpasok ang mayroon?

Kada Pebrero, aming sinisiyasat ang mga magulang/mga tagapag-alaga ng Junior at Senior Kindergarten na mga estudyante para sa interes sa isang programang batay sa bayad programa bago at pagkatapos ng pagpasok, na eksklusibo para sa mga estudyante ng kindergarten. Ang mga programang ito ay pinatatakbo ng isang ikatlong-partidong tagapagbigay ng pangangalaga sa bata sa paaralan. Ang pagpoprograma ay ibinibigay mula 7:00 a.m. hanggang 9:00 a.m. at 3:30 hanggang 6:00 p.m. — bagamat ang eksaktong oras ng programang ito ay maaring mag-iba-iba.

Bilang isang magulang/tagapag-alaga, kayo ay makakatanggap ng survey ukol sa bago at pagkatapos ng pagpasok kapag kayo ay nagparehistro ng inyong anak para sa kindergarten sa inyong lokal na paaralan. Mangyaring tandaang isumite ang inyong nakumpletong survey sa paaralan bago matapos ang Pebrero. Ipapaalam sa inyo sa Abril kung ang inyong paaralan ay mayroon o walang sapat na interes para sa isang programa.