ᐅᔥᑭ ᑭᑭᓄᐊᒪᐧᐊᑲᓇᒃ
ᐃᐃᒪ ᑐᕋᓐᑐ ᑭᑭᓄᐊᒪᑫᐧᐃVᒃ ᑲᑭᑭᓄᐊᒪᐧᐃᓐᐧᑕ
ᐅᑲᐯᔑᐧᐃᓂᒃ ᑫᑐᑕᒧᐧᐊᒡ: ᑫᓂᔑᐧᑲᔭᒋᒡ ᐅᑭᑭᓄᐊᒪᑯᐧᐃᓂᒃ
ᒥᐅᐧᐁ ᐊᐱ ᐁᒋᑫᓐᑕᐧᑲᓂᒃ ᓂᑕᒻ ᑲᓂᒪᒋ ᑭᑭᓄᐊᒪᑯᓯᐧᐊᒡ ᑲᔦ ᐁᑭᑭᓇᐧᐊᐸᑕᐃᐧᐁᒪᑲᓂᒃ ᐁᓂᐅᔥᑭᒪᒋᑐᒡ ᑫᑯᓂ ᑭᓂᒐᓂᒡ. ᐅᐅᒪ ᑕᔥ ᑐᕋᓐᑐ ᑭᑭᓄᐊᒪᑫᐧᐃ ᐊᐱᑕᒪᑫᐧᐃᓂᒃ ᑲᑭᑭᓄᐊᒪᑫᐧᐊᒡ ᐅᑐᓐᒋ ᐧᐃᑐᑲᐧᐊᐧᐊᓐ ᑲᑭᓇ ᐊᐱᓄᒋᔕᐃ ᑫᒋᓇᒡ ᐧᐁᐧᐁᓂ ᒋᐊᓂᐱᒥ ᑭᑭᓄᐊᒪᑯᓯᐧᐊᒡ
ᐸᑎᓇᑐᓐ ᑫᑯᓇᓐ ᑫᑭᐃᔑᒋᑫᔭᓐ ᑲᐃᔑᑲᐯᔑᔭᓐ ᑫᑭᐅᓐᒋ ᐧᑲᔭᓐᒋᑕᒪᐧᐊᒡ ᐅᑐᔥᑭ ᑭᑭᓄᐊᒪᑯᓯᐧᐃᓐ ᒋᒥᐧᓀᑕᒃ ᑲᔦ ᒋᐧᐃᒋᐃᑯᒡ ᒋᑲᑲᓱᒪᒡ ᑲᔦ ᑭᓂᒐᓂᔅ ᒋᑲᐧᑫᒋᑐᒡ ᐅᔥᑭ ᑫᑯᓇᓐ ᑲᔦ ᐸᑲᓐ ᐃᔑᒋᑫᐃᑯᐧᐃᓇᓐ ᒋᑲᐧᑫᐧᑌᒡ ᑫᑯᓇᓐ ᑲᔦ ᒋᓇᓇᐧᑫᑕᑭᓐ ᑫᑯᓇᓐ ᒥᐃᒪ ᑫᓄᒋᐧᐃᑐᑲᐧᐊᒡ ᑫᓄᒋᒪᔥᑲᐧᐃᑲᐸᐧᐃᒡ ᐅᑭᑭᓄᐊᒪᑯᐧᐃᓂᒃ
ᒋᐧᐸ ᐊᓂᒪᒋᑭᑭᓄᐊᒪᑯᓯᓇᓂᐧᐊᒃ, ᑕᐧᐃᓭᑐᓐ ᒋᔑᐧᐃᒋᐧᐊᒡ ᑭᓂᒐᓂᔅ ᒋᑭᐊᓄᒋ ᓂᓯᑕᐧᐁᓐᑕᒃ ᐊᓐᑎ ᐁᓂᓇᑕᒧᓐᒃ ᑭᑭᓄᐊᒪᑫᐧᐃᑲᒥᑯᒃ ᑲᐊᐃᔑᓇᐧᑲᒃ ᑭᑭᓄᐊᒪᑫᐧᐃᑲᒥᒃ ᑲᔦ ᐧᐊᑲᐃ ᑭᑭᓄᐊᒪᑫᐧᐃᑲᒥᑯᒃ ᒋᐊᓂ ᓇᓇᒪᔦᓐᑕᒃ
ᒥᐅᓄ ᐊᓂᑦ ᐧᐃᓐᒋᑫᐧᐃᓇᓐ ᑫᑭᐅᓐᒋ ᐧᐃᑐᑲᑯᔭᓐ ᑫᓂᔑᐧᑲᔭᒋᒡ ᐧᐁᐧᐁᓂ ᒋᔑᓭᓂᒃ ᐅᑐᔥᑭ ᑭᑭᓄᐊᒪᑯᓯᐧᐃᓐ
| ᐊᐱᓄᒋᔕᒃ ᑲᑕᔑ ᑭᑭᓄᐊᒪᐧᐃᓐᐧᑕ |
ᑲᐃᔑᑲᐯᔑᔭᓐ ᐅᐅᐧᐁ ᑭᑕᐃᔑᒋᑫᓇᐧᐊ |
| ᐅᑲᐧᐊᐸᒪᐧᐊᓐ ᐧᐃᑲ ᑲᑭᐱᐧᐊᐸᓯᐧᑲ ᐊᐧᐃᔭᒃ ᑲᔦ ᐅᔥᑭ ᑫᑯᓇᓐ ᐅᑲᐧᐊᐸᓐᑕᓇᐧᐊ |
ᐃᔑᐧᐃᒋᐤ ᑭᓂᒐᓂᔅ ᑫᓄᒋ ᐧᐊᐸᒪᒡ ᐧᐃᑲ ᑲᐧᐊᐸᒪᓯᒃ ᐊᐧᐃᔭᒃ ᒋᔕᒡ ᑐᕋᓐᑐ ᑭᑭᓄᐊᒪᑫᐧᐃᓂᒃ ᐅᓂᑭᐃᑯᒪᒃ ᑲᔦ ᑎᐯᓐᒋᑫᐧᐃᓐ ᑲᐧᐃᒋᐃᐧᑕ ᐅᔑᐱᐃᑫᐧᐃᓂᒃ ᑫᒪ ᒪᓯᓇᐃᑲᓇᓐ ᑲᐃᔑᐊᑌᑭᓐ ᑲᐊᑭᓐᒋᑫᑕᒪᐧᐃᓐᐧᑕ |
| ᑕᐊᓐᑕᐧᐁᑕᑯᓯᐧᐊᒃ ᐧᐁᐧᐁᓂ ᒋᑲᑲᓄᓇᐧᐊᒡ ᑯᑕᑭᔭᓐ ᐊᐱᓄᒋᔕᐃ ᑲᔦ ᑲᑭᒋᐊᐧᐃᐧᐊᒡ |
ᑲᑲᓱᒻ ᑭᓂᒐᓂᔅ ᒋᓂᑕᐧᐃᑭᐧᔐᒡ ᑫᓄᒋ ᓂᓯᑐᑕᐧᐊᑲᓂᐧᐃᒡ ᑫᑯᓐ ᑲᑲᐧᑫᐧᑌᒡ (ᑕᐱᔥᑯ ᐧᐃᐃᔕᒡ ᒥᓯᐧᐃᑲᒥᑯᒃᐧᐃᒥᓂᐧᑫᒡ) ᑲᔦ ᒋᒪᒥᓄᓇᒡ ᑫᑯᓐ ᑲᒪᔑᓭᓂᒃ ᑕᐱᔥᑯ ᑎᐸᐸᒥᐧᐁᐧᐃᓐ |
| ᒋᓂᑕᐧᐊᐧᐁᐱᓂᑎᓱᐧᐊᒡ ᐊᐧᑲᒋᒡ ᒋᐅᑕᒥᓄᐧᐊᒡ ᑲᔦ ᒋᐊᓂᑭᐧᐁᐧᐊᒡ |
ᑲᑲᓱᒻ ᑭᓂᒐᓂᔅ ᐧᐃᓂᑯ ᒋᐧᐊᐧᐁᐱᓂᑎᓱᒡ (ᑕᐱᔥᑯ ᒋᐱᑕᑯᑌᐃᑎᓱᒡ ᒋᐱᑕᑭᓯᓀᒡ ᑫᒪ ᐊᐧᑲᒋᒃ ᒥᑕᔅ
|
| ᒋᐅᓀᑕᒧᐧᐊᒡ ᑫᑯᓇᓐ ᑕᐱᔥᑯ ᐃᔑᒋᑫᐧᐃᓇᓐ ᑲᑕᔑ ᒪᒪᐧᐃ ᑭᑭᓄᐊᒪᑯᓯᐧᐊᒡ ᑫᑯᓀᓇᓐ ᑫᐊᐸᒋᑐᐧᐊᒡ |
ᐧᐃᑐᑲᐤ ᑭᓂᒐᓂᔅ ᒋᐅᓀᑕᒪᓱᒡ ᑫᑯᓇᓐ ᑕᐱᔥᑯ ᑫᑯᓀᓐ ᑫᑭᑭᔥᑲᒃ ᑫᑯᓀᓐ ᑫᐃᔑᒋᑫᒡ |
| ᑕᑎᐸᐸᒥᐧᐁ ᑲᔦ ᐅᑲᑕᐧᐃᔥᑲᒪᐧᐊᓐ ᑯᑕᑭᔭᓐ ᐊᐱᓄᒋᔕᐃ |
ᐧᐃᑐᑲᐤ ᑭᓂᒐᓂᔅ ᒋᐧᐊᐧᐃᒋᐧᐊᒡ ᑯᑕᑭᔭᓐ ᐊᐱᓄᒋᔕᓐ ᒋᑭᑫᓐᑕᒃ ᒋᑎᐸᐸᒥᐧᐁᒡ ᑲᔦ ᒋᒪᒣᔥᐧᑲᒋ ᑕᐧᐃᔥᑲᒪᑫᒡ |
| ᐅᑲᓂᑭᑫᓐᑕᓐ ᐱᒥᐃᔑᒋᑫᐧᐃᓇᓐ ᑲᑕᔑ ᒪᒪᐧᐃ ᑭᑭᓄᐊᒪᑲᓂᐧᐊᒃ ᑲᔦ ᒥᓯᐧᐁ ᑭᑭᓄᐊᒪᑫᐧᐃᑲᒥᑯᒃ ᐅᑲᓂ ᓂᓯᑕᐧᐁᑕᓇᐧᐊ ᐧᐁᐧᐁᓂ ᒋᑲᓇᐧᐁᑕᒧᐧᐊᒡ ᑫᑯᓇᓐ ᑲᔦ ᐅᑎᐱᓇᐧᐁᐧᐃᓯᐧᐃᓂᐧᐊ. |
ᑲᑲᓱᒻ ᑭᓂᒐᓂᔅ ᐧᐁᐧᐁᓂ ᒋᐱᓯᓐᑕᒃ ᐅᐧᐃᓐᑕᒪᑯᐧᐃᓇᓐ ᑲᔦ ᒋᐱᒥᓂᔕᐊᒃ ᑲᐃᔑᐸᑯᓭᓐᑕᑯᓯᒡ ᐧᐃᑐᑲᐤ ᑭᓂᒐᓂᔅ ᒋᑭᑫᑕᒃ ᒋᐸᐸᒥᓯᑲᑕᒃ ᑫᑯᓂ ᑕᐱᔥᑯ ᒋᓴᑲᑭᓇᒃ ᐅᑐᑕᒥᐧᓇᑲᓇᓐ ᑲᔦ ᐅᑎᐱᓇᐧᐁᐧᐃᓯᐧᐃᓇᓐ ᒋᓇᐃᑲᑭᓐ
|
| ᐅᑲᐱᓐᓯᑕᓇᐧᐊ ᑎᐸᒋᒧᐧᐃᓇᓐ ᑎᐸᒋᒧᐧᐃᓀᓴᓐ ᑲᔦ ᐧᐃᓐᒋᑫᐧᐃᓇᓐ ᐅᑲ ᑲᓇᐧᐊᐸᑕᓇᐧᐊ ᐅᑲᑕᔑᓐᑕᓇᐧᐊ ᑲᔦ ᐅᑲᐊᑭᓐᑕᓇᐧᐊ ᐅᒪᓯᓇᐃᑲᓂᐧᐊ ᑲᔦ ᑕᒪᒪᐧᐃ ᐊᑭᓐᒋᑫᐧᐊᒃ |
ᑎᐸᒋᒧᑕᐤ ᐧᐊᐧᐃᓐᑕᒪᐤ ᑫᑯᓇᓐ ᑲᔦ ᓂᑲᒧᑕᐤ ᑭᓂᑯ ᑲᐃᔑᑭᐧᔐᔭᓐ ᐊᑭᓐᒋᑫᑕᒪᐤ ᑭᓂᒐᓂᔅ ᑲᔦ ᑕᔑᓐᑕᒧᒃ ᒪᓯᓇᑭᓯᑲᓇᓐ ᐃᓀᓐᑕᒧᐧᐃᓇᓐ ᑲᔦ ᐃᑭᑐᐧᐃᓇᓐ ᐃᓄᐊᒪᐤ ᑭᑭᓇᐧᐊᒋᒋᑲᓇᓐ ᐃᑭᑐᐧᐃᓇᓐ ᑲᔦ ᐊᑭᑕᓱᓇᓐ ᑭᑲᐯᔑᐧᐃᓂᒃ ᑲᔦ ᑕᔑᑫᐧᐃᓂᒃ ᐃᔕᐅᒃ ᒪᓯᓇᐃᑲᓇᓐ ᑲᐃᔑᐊᑌᑭᓐ |
| ᐅᑲᐧᐊᐸᒪᐧᐊᓐ ᑲᑭᒋᐊᐧᐃᐧᐊᒡ ᑲᔦ ᑯᑕᑭᔭᒃ ᐊᐱᓄᒋᔕᒃ ᐯᐸᑲᓐ ᒋᐃᔑᐱᐃᑫᐧᐊᒡ ᐅᑲᐊᐸᒋᑐᓇᐧᐊ ᒪᓯᓂᐱᐃᑲᓇᑎᑯᓐ ᑲᔦ ᑯᑕᑭᔭᓐ ᐸᑲᓐ ᐅᔑᐱᐃᑲᓇᑯᓐ ᑫᒪᓯᓂᐱᐃᑲᑫᐧᐊᒡ ᑲᔦ ᒋᐅᔑᐱᐊᒧᐧᐊᒡ ᐅᑎᓀᑕᒧᐧᐃᓂᐧᐊ |
ᑲᑲᓱᒻ ᑭᓂᒐᓂᔅ ᒋᒪᓯᓂᐱᐃᑫᒡ ᑲᔦ ᒋᐅᔑᐱᐊᒃ ᑕᓱᑭᔑᑲ ᐃᔑᒋᑫᐧᐃᓇᓐ ᑲᐯᔑᐧᐃᓂᒃ ᑕᐱᔥᑯ ᒋᐅᔑᑐᒡ ᐯᐸᓄᔅ ᒋᐅᔑᐱᐊᒡ ᐅᐧᐃᓱᐧᐃᓐ, ᒋᒪᓯᓂᐱᐃᑫᒡ ᒪᒥᐧᓇᒋᒻ ᑭᓂᒐᓂᔅ ᐅᑐᔑᐱᐃᑲᓇᓐ ᑲᔦ ᐅᒪᓯᓂᐱᐃᑲᓇᓐ ᑲᑲᓄᔥ ᑲᔦ ᑲᐃᔑᓂᑲᓱᒡ ᑲᔦ ᑲᐃᔑᐱᐃᑲᑌᓂᒃ ᐅᐧᐃᓱᐧᐃᓐ |
|
ᐅᑲᓇᓇᑕᐧᐃᑭᑫᑕᓇᐧᐊ ᑫᑯᓇᓐ ᒥᓯᐧᐁ ᐊᑭᒃ ᑲᐧᐊᐸᒋᑲᑌᑭᓐ ᑲᔦ ᐅᑲᑕᔑᓐᑕᓇᐧᐊ ᑫᑯᓇᓐ ᑲᐧᐊᐸᑕᒧᐧᐊᒡ ᑲᔦ ᑲᑭᐱ ᑲᑭᑫᓐᑕᒧᐧᐊᒡ
|
ᐧᐊᐧᐃᓐᑕᒪᐤ ᑭᓂᒐᓂᔅ ᑫᑯᓇᓐ ᑲᐧᐊᐸᓐᑕᒣᒃ ᑲᔦ ᑲᓄᑕᒣᒃ ᐊᐧᑲᒋᒃ ᑲᔦ ᒋᐸᐸᒧᓭᔦᒃ ᑕᔑᑫᐧᐃᓂᒃ ᐃᓄᐊᒪᐤ ᑫᑯᓇᓐ ᑕᐱᔥᑯ ᑲᓂᐸᑲᓂᐃᔑᐧᐁᐸᒃ ᑲᓂᐊᔭᓐᐧᐁᐸᒃ ᑫᒪ ᐸᑲᓐ |
| ᑕᑭᑭᓄᐊᒪᐧᐊᑲᓂᐧᐃᐧᐊᒃ ᐊᑭᑕᓱᓇᓐ ᑲᐊᐃᔑᓇᑯᓯᐧᐊᒡ ᑲᓂᔑᐊᓂᑫᐱᐅᐧᑕ ᑲᐅᓇᑭᒥᐧᑕ, ᑲᑎᐸᐃᑲᑲᓂᐧᐊᒃ ᐅᑲᑕᔑᑕᓇᐧᐊ ᑲᐃᓀᑕᒧᐧᐊᒡ ᑲᔦ ᑲᓂᔑ ᐱᒥᑭᑫᑕᒧᐧᐊᒡ |
ᐧᐊᐧᐃᓐᑕᒪᐤ ᐊᑭᑕᓱᓇᓐ, ᑲᐊᐃᔑᓇᑯᓯᐧᐊᒡ ᑲᓂᔑᐊᓂᑫᐱᐅᐧᑕ ᑭᑲᐯᔑᐧᐃᓂᒃ ᑲᔦ ᐊᐧᑲᒋᒃ. ᐅᑕᒥᓄᒃ ᑎᐸᒋᑭᑫᐧᐃᓐ ᐊᑭᒋᑫᐧᐃᓐ, ᑌᐊᒪᓇᒃ ᑲᐧᐁᓐᑕᑭᓐ ᐅᑕᒥᓄᐧᐃᓀᓴᓐ ᐊᐱ ᑭᔑᑌᐳᔭᓐ ᐊᓄᔥ ᑭᓂᒐᓂᔅ ᒋᐧᐃᒋᐃᒃ ᒋᑎᐸᓯᐧᐊᒋᑫᑕᒪᐧᐃᒃ. ᐊᓄᔥ ᑲᔦ ᒋᓴᑲᑭᓇᑭᓐ ᑫᑯᓇᓐ ᑕᐱᔥᑯ ᐅᑐᑕᒥᐧᓇᑲᓇᓐ ᐅᑭᑭᔥᑭᑲᓇᓐ, ᒥᒋᒪᓐ |
| ᐅᑲᐅᔑᑐᓇᐧᐊ ᑫᑯᓇᓐ ᐅᑲᓇᓇᑲᒋᑐᓇᐧᐊ ᑲᔦ ᒋᓂᑕ ᐊᐸᒋᑐᐧᐊᒡ ᒪᓯᓂᐱᐃᑫᐧᐃ ᐊᐸᒋᒋᑲᓇᓐ ᐅᑲᐅᔑᑐᓇᐧᐊ ᑫᑯᓇᓐ ᓂᑲᒧᐧᐃᓂ ᑲᔦ ᑭᑐᒋᑫᐧᐃᓂ ᐅᑲᑐᑕᓇᐧᐊ ᐅᑕᒥᓄᐧᐃᓂ ᑲᔦ ᐧᐊᐧᐊᑲᐧᐃᐧᐃᓂ |
ᑲᑲᓱᒻ ᑭᓂᒐᓂᔅ ᒋᐱᒥᓂᔕᐊᒃ ᑫᑯᓐ ᑲᐃᓀᑕᒃ ᑲᔦ ᐅᑎᓀᑕᒧᐧᐃᓂᒃ ᒋᒪᓯᓂᐱᐃᑫᒡ, ᒋᐅᔑᑐᒡ ᑫᑯᓂ, ᒋᓂᑲᒧᒡ, ᒋᑭᑐᒋᑫᒡ, ᑫᒪ ᒋᐅᑕᒥᓄᒡ ᑎᐸᒋᒧᐧᐃᓂᒃ. |
|
ᐅᑲᐊᐸᒋᑐᓇᐧᐊ ᐯᐸᑲᓐ ᐊᐸᒋᑕᑲᓇᓐ ᑲᔦ ᑯᑕᑭᔭᓐ ᑭᑭᓄᐊᒪᑫᐧᐃ ᑫᑯᓇᓐ ᑫᓄᒋ ᑲᔥᑭᑐᐧᐊᒡ ᑫᑯᓐ ᑲᑐᑕᒧᐧᐊᒡ ᑲᔦ ᑲᐅᔑᑐᐧᐊᒡ
|
ᐅᓐᒋᑕᒪᐤ ᑭᓂᒐᓂᔅ ᑫᑯᓇᓐ ᐊᓐᑎ ᑫᐅᓐᒋ ᑲᐧᑫᒋᒡ ᒋᐅᒋ ᑭᔑᔕᐧᐃᐸᓂᐅᒡ ᑕᐱᔥᑯ ᒋᐸᐸᒥᐸᑐᒡ ᒋᐃᐧᑲᓐᑕᐧᐁᒡ, ᒋᐧᑲᔥᐧᑫᓇᑐᐁᒡ ᑲᔦ ᐅᓂᒋᓐ ᒋᓂᑕᐊᐸᒋᑐᒡ ᑕᐱᔥᑯ ᒪᓯᓂᐱᐃᑲᓇᑯᓐ ᒋᐊᐸᒋᑐᒡ, ᒋᐅᔑᒋᔥᑭᐧᐊᑭᓂᑫᒡ, ᒋᓇᓇᐱᓇᑭᓐ ᓇᓇᐱᓂᑲᓇᓐ |
ᑭᓐ ᒪᔭ ᑲᑭᑭᓄᐊᒪᐧᐊᒡ ᑭᓂᒐᓂᔅ
ᐅᐅᒪ ᑐᕋᓐᑐ ᑭᑭᓄᐊᒪᑫᐧᐃ ᐊᐱᑕᒪᑫᐧᐃᓂᒃ ᐅᑕᐧᔕᐸᓐᑕᓇᐧᐊ ᒋᐧᐃᑕᓄᑭᒥᐧᑲ ᑲᔦ ᑭᓂᒐᓂᔅ ᒣᐧᑲ ᐊᐱ ᒥᓇᐧᐊ ᐊᓂᐱᒥ ᑭᑭᓄᐊᒪᑫᓇᓂᐧᐊᒃ ᒥᓇᐧᐊ ᑲᔦ ᐧᐁᑎ ᐊᓂᓂᑲᓐ